مكارم النفس

يابن ادم احذر من تجـاره  تخسـرك
لا بت فيها غالب اصبحـت  مغلـوب
كان الله اغناك احذر البخـل  يفقـرك
عند الله الدرهم ترى بعشر  محسـوب
الّبس من ثياب الكرم ثـوب  يستـرك
ثوب الكرم يستر ترى كـل عـذروب
ولا جدت لا تطلب من الناس تشكـرك
دامك لرب النـاس بالشكـر مطلـوب
جود بسبيل اللي على الجـود يأجـرك
ولا انت مهما تعطي النـاس مسبـوب
واحذر ابليس بفضـل ربـك  يكفـرك
لا تشتري في مالـك اثـام  واذنـوب
واحذر على مـولاك مالـك  يكبـرك
ترى التواضع طيب والكبـر معيـوب
ولا تحتقر مخلـوق خالقـك  يحقـرك
وتحتاج للي جاك محتـاج  مغصـوب
ايمنـك ذل لكبـر قـارون وايسـرك
عزّ التواضع من قديـم ابـن يعقـوب
ولا قل رزقك واصبح الفقـر كاسـرك
وضاقت عليك ديون دنيـاك وكـروب
لاتطلب الا اللي كتب يـوم  صـورك
رزقك على جبهتك واستغفـر  وتـوب
دنياك كسرة خبـز تشبـع  تضـورك
جوع وستر عورتك فيها تـرى ثـوب
عشها كما حرٍ علـى العـز  ماكـرك
الحـر لـو مايمتلـك مـال  مهيـوب
واسأل على ضيقك مـن الله يصبـرك
سبحان من صبر على الضيق  ايـوب
شيئين لـو ماجيتهـا تجيـك ابشـرك
رزقك وموتك عنك ماحد بهـا ينـوب
واحذر لواهيب الحسد فـي ضمايـرك
تقيد وضلوعك حطـب كـل لاهـوب
اقصر عن ارزاق المخاليـق ناظـرك
كـلٍ تـرى رزقـه مقـدر ومكتـوب
من بحر ماضيك ابحرت سفن حاضرك
ومستقبلك شاطي بها عنـك محجـوب
والعمر رحلة والردي كـان  سايـرك
فيها مشابـك للـردى طـرق ودروب
ساير بها اللي بذكـر ربـك  يذكـرك
وعلى دروب الطيب ياخذك  مصحوب
لا لذت عن ريح الزمن فيـه يجبـرك
شغموم ماهو في هوى النفس شغنـوب
نشمي علـى نفسـه مبديـك  ياثـرك
ماحب ذاته هو مـن الغيـر محبـوب
وكانك تبـا حتـى عذولـك  يقـدرك
لو كنت ماتملك مـن المـال منسـوب
لاتعصي من في بـر شيبانـك امـرك
واصدق ولا تنطق من القول  مكـذوب
وعن عرض خلق الله تعفف واحـذرك
جمر الجزأ من نار الاعمال  مشبـوب
لاتتبـع الرغبـه بخطـوة مشاعـرك
دنياك فيهـا كـل ممنـوع  مرغـوب

عن binwanies